ყოველ ორშაბათს 7-ზე, კინოთეატრ ამირანში

ბილეთის ფასი 10 ლარი

სტუდენტებისთვის, DOCA-ს წევრებისთვის 5 ლარიხელმისაწვდომია მხოლოდ სალაროში

კინოდარბაზი ადაპტირებულია ეტლით მოსარგებლეთათვის

14 სექტემბრიდან 26 ოქტომბრამდე დოკას კინოკლუბი წარმოგიდგენთ ახალ პროგრამას.

კურატორის სიტყვა

ქართული დოკუმენტური კინოს შესწავლა ერთ-ერთი ყველაზე საინტერესო და ამაღელვებელი პროცესია. ეს გულისხმობს მისი ისტორიის, მეხსიერების, ფორმების, ენის, ამბებისა და თემატური მრავალფეროვნების კვლევას და პარალელურად, იმდროინდელი გამოწვევების, სატკივარის, ბრძოლების, ოფიციალური ნარატივებისა და საავტორო ძიებების გააზრებას.

საინტერესოა სხვადასხვა ათწლეულში გადაღებული ფილმების აღმოჩენა, მათი ხელახლა გაცოცხლება და დაბრუნება როგორც ეკრანზე, ისე სადისკუსიო, კვლევით და ყოფით სივრცეში. ეს პროცესი არქეოლოგიას ჰგავს. გამოსახულებების, ადამიანების ხმების, ბიოგრაფიების, კულტურული თუ კრიტიკული კონტექსტების და თავად ქვეყნის ისტორიის ძიებას.

ქართული კინოს ისტორია ზოგადადაც მითებსა და რეალობას შორის არის მოქცეული, თავისი საგანძურით, მონათხრობი ამბებით, გამონაგონითა თუ სინამდვილით. ქართული დოკუმენტური კინოს ისტორიის აღმოჩენა და შესწავლა კი მხოლოდ ახლა იწყება. ეს პროგრამაც ჰგავს ფრაგმენტების შეგროვებას დიდი, საერთო მეხსიერების არქივიდან, 1970-1980-იანი წლებიდან. ეს ის პერიოდია, როცა დოკუმენტური კინო კიდევ უფრო მეტად დგას მითსა და რეალობას შორის, თუმცა ეს წინააღმდეგობა მის საფუძველშივეა ჩადებული. სად არის რეალობა? სად არის ოფიციალური ხმა? სად არის ავტორის მზერა და პერსპექტივა?

საბჭოთა რეალობიდან დამოუკიდებელ ქვეყნად ტრანსფორმაციის გზაზე, ამ პროგრამაში შეხვდებით: შრომის ვიზუალიზაციას; პოეზიასა და პოლიტიკას, საავტორო ხმებს; გამოსახულებას, რომელიც ხანდახან კადრს მიღმა ხმაზე მეტს ყვება; ვიზუალურ და აკუსტიკურ ექსპერიმენტებს; ქალების - მებრძოლს, მშრომელს, დაღლილს და გაუტეხელს; ყოფაზე დაკვირვების ხელოვნებას და ამ რეალობასთან დიალოგის მცდელობას, იქნება ეს შემოქმედებითი ენით თუ ზედმიწევნითი დოკუმენტირებით. რაც მთავარია, შეხვდებით ადამიანების ცხოვრებას, ადგილების მეხსიერებას და უნიკალურ ფორმებს, 1967 წლიდან 1990 წლის ჩათვლით. ისტორიებს, რომლებსაც ბევრი რამის თქმა შეუძლიათ ჩვენთვის.

1970-1980-იანი წლების ქართული დოკუმენტური კინო

ფილმები

14/09/2026 19:00 კინოთეატრი ამირანი

არაბესკები ფიროსმანის თემაზე - რეჟისორი: სერგო ფარაჯანოვი

21’ / 1985

სკოლა მთაში - რეჟისორი: თეიმურაზ დოლიძე

10’ / 1978

სიზმრებიდან ყოფამდე - ორი რადიკალურად განსხვავებული ფორმა, რომელიც გვიჩვენებს, რამდენად ფართო შეიძლება იყოს დოკუმენტური კინოს დიაპაზონი. ერთი მხრივ, ფარაჯანოვის სიზმრისეული, პოეტური და ჯადოსნური ენა, რომელიც ფიროსმანის სამყაროს მოხელთებას ცდილობს; მეორე მხრივ კი, ობსერვაციული ფილმი, რომელიც მთაში მცხოვრები ბავშვების ყოველდღიურობას აკვირდება.

21/09/2026 19:00 კინოთეატრი ამირანი

თიბათვე - რეჟისორი: მერაბ გაგუა

9’ / 1980

ხაბაზები - რეჟისორი: ბიძინა რაჭველიშვილი

10’ / 1970

ტაკელაჟის გზები - რეჟისორი: ნიკოლაი კუზანოვი

10’ / 1986

უდაბნო - რეჟისორი: ალექსანდრე (დათო) ქოქრაშვილი, სანდრო

თუშმალიშვილი

16’ / 1982

ჩუმი შრომა, შრომის პოეზია - ადამიანების შრომის ვიზუალიზაცია ამ პერიოდში განსაკუთრებით მნიშვნელოვანი იყო. ეს ფილმები გვიზიარებენ ჭვრეტის ხელოვნებას და ყოველდღიური რუტინის ნამდვილ მაგიას.

28/09/2026 19:00 კინოთეატრი ამირანი

ქალები ქვის ღობის მიღმა - რეჟისორი: თენგიზ მალანია

20’ / 1990

თუშური ხალიჩა - რეჟისორი: შერგილ შონია

10’ / 1972

ვის ტკივა გული - რეჟისორი: მაია ქავთარაძე

10’ / 1989

ქალების პორტრეტები - ყოფასა და გამოწვევებს შორის

05/10/2026 19:00 კინოთეატრი ამირანი

კოლხიდა - რეჟისორი: სოსო ჩხაიძე

20’ / 1967

სპეციალური ჩვენება და საუბარი სოსო ჩხაიძის „კოლხიდაზე“. ფილმის უნიკალური ვიზუალური ენა სივრცისა და ადამიანთა შრომის ასახვისას რეალურსა და მითოსურს შორის ზღვარზეა. ფილმი მნიშვნელოვან მეხსიერებას წარმოადგენს მეოცე საუკუნის ქართულ დოკუმენტურ კინოში და რამდენიმე ათწლეულის თემატურ და ვიზუალურ იმპულსებს საინტერესო დისკუსიის საგნად აქცევს.

12/10/2026 19:00 კინოთეატრი ამირანი

მთაწმინდა - რეჟისორი: ვაჟა ზუბაშვილი

16’ / 1980

დირექტორი - რეჟისორი: ვაჟა ზუბაშვილი

26’ / 1982

სადღაც ომი იყო - რეჟისორი: ვაჟა ზუბაშვილი

20’ / 1989

ვაჟა ზუბაშვილის რეტროსპექტივა - 1980-იანი წლების მეხსიერება მოხელთებული ვაჟა ზუბაშვილის კინოში, განსხვავებული თემებით, ფორმებით, რეფლექსიით დროსა და გამოწვევებზე. მისი კამერა საინტერესო რეფლექსიას გვთავაზობს ადგილებზე, მათთან დაკავშირებული მითოსზე და რაც მთავარია ადამიანების მდგომარეობაზე. მთაწმინდა და მისი არაორდინალური პორტრეტი, ვიზუალური და აკუსტიკური, ენობრივი ძიებებით; საბჭოთა დირექტორი ქალის პორტრეტი და მისი ყოველდღიურობა გადმოცემული სიმსუბუქით, ცოცხალი დაკვირვების პროცესით; და ბოლოს ომში მებრძოლი ადამიანების ტრავმების გადახედვა.

19/10/2026 19:00 კინოთეატრი ამირანი

მეკვლე - რეჟისორი: გოდერძი ჩოხელი

15’ / 1981

სტარტი - რეჟისორი: მიხეილ ჭიაურელი

10’ /1981

სიყვარული - რეჟისორი: ლეო ბაქრაძე

25’ / 1985

რეკლამა - რეჟისორი: ყავის საფქვავი „არომატი“

3’ /1973

ვიზუალურ-აკუსტიკური კვლევა - განსხვავებული ფილმები, სადაც გამოსახულება, ხმა და რიტმი თხრობის მნიშვნელოვანი ელემენტი ხდება. პოეტური დაკვირვება, მთის სივრცე, ადამიანის მოძრაობა და ექსპერიმენტული ფორმა, მონტაჟი. მეორე მხრივ, საუბარი, ამბის მოყოლა და ბოლოს, ამ პერიოდის რეკლამა, რომელიც ასევე, საინტერესო ვიზუალური ნიმუშია.