“ავტოპორტრეტი ზღვარზე” იდენტობითა და საზღვრებით შეპყრობილობაზეა. აფხაზეთის ომის დროს დაკეტილი სახლის კარის გაღების შემდეგ, იქ დაგუბებული მტკივნეული და პირადი ამბები გამოხატვის გზას პოულობს და თხრობის ექსპერიმენტულ ფორმას იძენს.

“ავტოპორტრეტი ზღვარზე” პირადი და საჯარო საარქივო მასალებითა და აფხაზეთში გადაღებული კადრებით, ქართულ-აფხაზური რთული ურთიერთობების პერსონალურ განზომილებაზე ჰყვება.

ფილმის პრემიერა შედგა Visions du Réel-ზე შვეცარიაში, სადაც მთავარი პრიზი მოიპოვა.

სპეციალური სტუმარი: ფილმის რეჟისორი ანნა ძიაპშიპა

“ძველი ჭრილობები მოშუშებას ვერ ასწრებს. ისინი ახალი ჭრილობებით იფარება”- კადრს მიღმა ხმა, პალესტინელ გლეხს, ემად ბურნატს ეკუთვნის, რომელიც დასავლეთ სანაპიროზე მისი სოფლის მიწაზე მომდგარმა ისრაელელების ბარიერმა დოკუმენტალისტად აქცია. 2005 წელს ახალშობილი ვაჟის გადასაღებად ემადს კამერა აჩუქეს. საოჯახო ვიდეო მასალასთან ერთად, ეს კამერა ისრაელის ახალმოსახლეების მიერ დასავლეთ სანაპიროს ‘მცოცავი ოკუპაციის’ მოწმე ხდება.

სოფელ ბილინში, სასაზღვრო ხაზთან, პირადი განუყოფელია პოლიტიკურისგან. სამოყვარულო კამერები კი ერთმანეთის მიყოლებით იმტვრევა, ქვებისა და იარაღის ზუზუნში.

სპეციალური სტუმარი: დათო ლაღიძე, მკვლევარი

სამხედრო ვერტმფრენების თერმული კამერები ღამით მოძრავი თბილი სხეულების ეჭვისაღმძრავ მოძრაობას აკვირდება. ავღანეთში, ერაყსა და სირიაში დისლოცირებული ამერიკელი და ფრანგი ჯარისკაცების სამსახურებრივი ვიდეოჩანაწერები ფილმის მასალად იქცევა.

თვალი მტკიცებულებების შეგროვებითაა დაკავებული, ხოლო კამერა, რომელიც იღებს, თანადროულად არის აპარატი, რომელიც კლავს. რამდენად მორალურია ფატალურ იარაღად გამოყენება დრონის, რომელის უსაფრთხო წერტილიდან იმართება? ვინ და როგორ იღებს გადაწყვეტილებას, ვინ უნდა მოკვდეს და ვინ - არა? რამდენად ემგვანება თანამედროვე ომი სიმულირებულ ვიდეო თამაშს?

სოსო დუმბაძის “მზიანი ღამე” ნაპოვნი აუდიო-ვიდეო მასალით შექმნილი ესსე ფილმია, რომელიც დამოუკიდებელი საქართველოს პოლიტიკურ, სოციალურ და რელიგიურ ლანდშაფტს აანალიზებს და იკვლევს საქართველოს მართლმადიდებლური ეკლესიის ურთიერთობას დამოუკიდებელი საქართველოს მთავრობებთან. ფილმი აკვირდება, თუ როგორ ხდებოდა ძალაუფლების გადანაწილება საქართველოს უახლეს ისტორიაში - დამოუკიდებლობის გამოცხადებიდან ანტი-LGBTQ პროტესტებამდე.

სპეციალური სტუმარი: რეჟისორი სოსო დუმბაძე

ლანა ღოღობერიძის უახლესი დოკუმენტური ფილმი რეპრესირებულ დედასთან მისი განშორებისა და შეხვედრის პირადი და ამაღელვებელი ისტორიაა.

“ცხოვრება შეხვედრა თუ განშორებაა?” - სვამს კითხვას რეჟისორი, დედისა და ქალიშვილის ფოტოზე დაკვირვებით ხსნის ფილმს და მისი ოჯახის ურთულეს, პერიპეტიებით, უზარმაზარი შემოქმედებითი მიღწევებითა და პირადი ტრაგედიებით სავსე ისტორიას გვიყვება. სამი თაობის ქალი კინორეჟისორის ცხოვრება ფილმში მთელი მეოცე საუკუნის საქართველოს ისტორიად იქცევა.

სპეციალური სტუმარი: რეჟისორი ლანა ღოღობერიძე

ორ ქალს, რომელიც სამყაროს სხვადსხვა წერტილში იმყოფება, დრო და ტერიტორია ჰყოფს. თუმცა პოლიტიკური ტურბულენტობის ჟამს მათ საერთო ცხოვრება აქვთ. საარქივო მასალებით აგებულ ფილმში ეს ორი ქალი ერთმანეთს წერილებით უკავშირდება და ასე ამარცხებს მანძილსა და პოლიტიკურ არეულობას.